Städtche lieht im Taunus drin,
Sein Name ist bekannt.
Die Faßnacht zieht do widder in
Wie ins gelobte Land.
Ihr wißt es all, ihr liewe Leut’,
Daß des nur Orschel is.
Drum kommt zu uns, ihr Fremde, heut,
Trinkt, lacht, liebt und genießt:

Refrain:
Mer haww’n widder, den Karneval,
Heut hört mer’s lache iwwerall.
Mir Orschler sinn so froh!
Die Fassenacht is do.



Es lacht das Herz vor Fraude uns,
Was is denn nur gescheh?
Soviel Tara, soviel Gebumms
Hat Orschel nie geseh’!
Es freut sich alles, Groß und Klaa,
Mer sieht kaa mies Gesicht,
Die älteste Leut’ sin uff de Baa
un jeder davon spricht:

Refrain:
Mer haww’n widder...



Im Klaaderschrank werd jetzt gewihlt,
Dehaam steht alles Kopp,
Jed’ Stickche Stoff des werd befiehlt,
Selbst’s Klaadche von de Bopp.
Die scheenste Sticker wer’n geschnappt,
Dann werd’ gleich aaprowiert,
E Hietche uff de Kopp gebabbt,
Des geht der wie geschmiert.

Refrain:
Mer hawwe’n widder...



Aamol im Jahr ganz närrisch soi,
Des is heut’ die Parol,
In jeden Kopp muß es enoi,
Drum macht de größte Kohl.
De Babba sächt zum Bübche klaa:
Heut’ sin mer all verrickt.
Do fängt de Knirps zu singe aa,
Un is ganz hochbeglickt.

Refrain:
Mer haww’n widder...